Naxçıvan Muxtar Respublikası Qida Təhlükəsizliyi Agentliyi fəaliyyətə başladığı ilk dövrlərdə muxtar respublikada mövcud olan resurslar çərçivəsində 2 istiqamət üzrə- qida və baytarlıq laboratoriyalarının fəaliyyətinin təmin edilməsi üçün işlərə başlanıldı. Hazırda agentliyin tabeliyində Naxçıvan Qida Təhlükəsizliyi İnstitutunun tərkibində həmin 2 istiqamət üzrə laboratoriyalar fəaliyyət göstərir. Lakin bu laboratoriyaların tam fəaliyyət göstərməsi üçün əlavə cihaz və avadanlıqlara ehtiyac duyulurdu.

"NAXÇIVANXƏBƏRLƏRİ" məlumat verir ki, bu sözləri jurnalistlərə açıqlamasında Naxçıvan Muxtar Respublikası Qida Təhlükəsizliyi Agentliyinin aparat rəhbəri Vasif Orucov deyib.

O qeyd edib ki, həm bu iki istiqamət üzrə, həm də muxtar respublikada mövcud olmayan, lakin zəruri ehtiyac duyulan digər iki istiqamət üzrə-fitosanitar və kompleks tədqiqatlar laboratoriyasının fəaliyyəti üçün lazım olan cihaz və avadanlıqların siyahısı və texniki göstəriciləri agentlik tərəfindən müəyyənləşdirilib. Ötən və cari il ərzində qida və baytarlıq laboratoriyaları üzrə zəruri ehtiyac olan bəzi laboratoriya avadanlıqları alınıb və laboratoriyaların istifadəsinə verilib. Hazırda idxal-ixrac əməliyyatları, eləcə də digər dövlət nəzarəti tədbirləri zamanı qida və heyvan mənşəli məhsulların laboratoriya üzrə mövcud resurslar çərçivəsində bəzi analizlərin aparılması təmin edilir.

Lakin həmin laboratoriyaların yerləşdiyi binalar müasir tələblərə tam uyğun deyil, mövcud, həmçinin cari il ərzində yeni alınmış cihazlardan əlavə cihaz və avadanlıqlara ehtiyac vardır. Bununla yanaşı fitosanitar və kompleks tədqiqatlar laboratoriyalarının da fəaliyyətə başlaması zəruridir, hansı ki bu iki istiqamət üzrə laboratoriya muxtar respublikada mövcud olmayıb.

NQTA rəsmisi bildirib ki, göstərilən ehtiyaclar nəzərə alınaraq “Naxçıvan Muxtar Respublikasının sosial iqtisadi inkişafına dair 2023-2027-ci illər üçün Dövlət Proqramı”nın 2025-2027-ci illər üzrə Təfsilatlı Tədbirlər Planı”nda muxtar respublikada laboratoriyalar sisteminin yaradılması məqsədilə çox əhəmiyyətli bir layihə nəzərdə tutulub: "Naxçıvan Muxtar Respublikasının Qida Təhlükəsizliyi Agentliyi sözügedən layihənin əsas icraçılarından biri olaraq müəyyən edilib. Agentlik tərəfindən layihənin icrası istiqamətində mərhələli şəkildə müvafiq işlər aparılır. Qeyd edim ki, Dövlət Proqramı çərçivəsində ən müasir standartlara və beynəlxalq akkreditasiya tələblərinə cavab verən laboratoriya binasının tikintisi və mövcud resurslar nəzərə alınmaqla əlavə ehtiyac olan müasir cihaz və avadanlıqlarla təchiz edilməsi nəzərdə tutulur. Hazırda laboratoriya binasının tikintisinin layihələndirilməsi işləri aparılır. Bu məqsədlə satınalmalar sahəsində qanunvericiliyin tələblərinə uyğun olaraq tenderin keçirilmiş və uğurla tamamlanıb. Artıq qalib təchizatçı ilə müqavilə bağlanılıb, topoqrafiya, geologiya işləri görülüb, şəhərsalma əsaslandırılması və layihələndirmə üzrə digər işlər davam etdirilir. Növbəti mərhələdə müvafiq ekspertizalar həyata keçiriləcək və layihə-smeta sənədləri hazır olduqdan sonra binanın tikilməsi ilə bağlı işlərə başlanılacaq. Layihənin icrasının 2027-ci ilin sonunadək yekunlaşdırılması və laboratoriyaların istifadəsinə verilməsi proqnozlaşdırılır. Dövlət Proqramı çərçivəsində tikiləcək yeni laboratoriya binası 3600 kvadratmetr əsas və 400 kvadratmetr yardımçı tikililərdən ibarət olacaq".

"Binada dörd istiqamətdə- qida, baytarlıq, fitosanitar və kompleks tədqiqatlar laboratoriyası fəaliyyət göstərəcək. Bu 4 istiqamət üzrə laboratoriyanın fəaliyyət göstərməsi muxtar respublikada qida təhlükəsizliyi sisteminin tam və texniki normativ hüquqi aktların tələblərinə uyğun qurulmasında, eləcə də muxtar respublika əhalisinin həyat və sağlamlığının qorunmasında əhəmiyyətli dərəcədə rol oynayacaq"- deyə Vasif Orucov əlavə edib